మద్యం మత్తులో గుట్టలకు తీసుకెళ్లి యువకుడు దారుణ హత్య
మనవరాలిపై వేధింపుల వివాదమే కారణం.
వాస్తవ గమ్యం / తెలంగాణ / మంచిర్యాల : జూన్ 25:మంచిర్యాల పట్టణ శివారులోని ఏసీసీ క్వారీ గుట్టల్లో జరిగిన వ్యక్తి హత్య కేసును పోలీసులు ఛేదించారు. ఈ హత్య ఆకస్మికంగా జరగలేదని, ముందస్తు పథకం ప్రకారమే అమలు చేసినట్లు సీఐ ప్రమోద్రావు వెల్లడించారు.వ్యక్తిగత విభేదాలు, కుటుంబ గౌరవానికి సంబంధించిన వివాదాలే ఈ దారుణానికి దారితీశాయని తెలిపారు.పోలీసుల వివరాల ప్రకారం, హత్యకు గురైన లక్పతి అదే కాలనీలో నివాసముంటున్న పద్మతో కొంతకాలంగా సహజీవనం చేస్తున్నాడు. ఈ క్రమంలో పద్మ మనవరాలిని వెంకటేశ్ అనే యువకుడు తరచూ వేధిస్తున్నాడని తెలుస్తోంది. ఈ విషయమై లక్పతి వెంకటేశ్ను పలుమార్లు మందలించడంతో ఇద్దరి మధ్య విభేదాలు తీవ్రరూపం దాల్చాయి.లక్పతి తనను అవమానించాడనే కోపంతో వెంకటేశ్ ప్రతీకారం తీర్చుకోవాలని నిర్ణయించుకున్నాడు. ఇందుకోసం తన స్నేహితులు వినోద్, నర్సింహులుతో కలిసి లక్పతిని హత్య చేయాలని పక్కా ప్రణాళిక రూపొందించినట్లు విచారణలో తేలింది. బుధవారం లక్పతిని మాటలతో నమ్మబలికి డంప్ యార్డ్ వెనుక ఉన్న నిర్జన గుట్టల ప్రాంతానికి తీసుకెళ్లారు.అక్కడ మద్యం తాగించిన అనంతరం ముగ్గురూ కలిసి అతనిపై దాడి చేసి హత్య చేసినట్లు పోలీసులు గుర్తించారు.హత్య అనంతరం నిందితులు ఘటనను ప్రమాదంలా చిత్రీకరించే ప్రయత్నం చేసినప్పటికీ, పోలీసులు సాంకేతిక ఆధారాలు, స్థానికుల సమాచారం, నిందితుల కదలికలను పరిశీలించి కేసును ఛేదించారు. విచారణలో నిందితులు నేరాన్ని అంగీకరించినట్లు సమాచారం. ఈ ఘటన స్థానికంగా తీవ్ర కలకలం రేపింది. చిన్నపాటి వ్యక్తిగత విభేదాలు ఎంతటి ఘోర నేరాలకు దారితీస్తాయో ఈ సంఘటన మరోసారి రుజువు చేసిందని పోలీసులు పేర్కొన్నారు. నిందితులపై హత్య కేసు నమోదు చేసి అరెస్టు చేసినట్లు సీఐ ప్రమోద్రావు తెలిపారు.
Reporter
వాస్తవ గమ్యం
మరిన్ని వార్తలు
Developed By :
